വാഷിങ്ടൺ: യുഎസും ഇറാനും തമ്മിലുള്ള വെടിനിർത്തൽ കരാറിനെ സ്വാഗതം ചെയ്ത ഐഎംഎഫ് മേധാവി ക്രിസ്റ്റലിന ജോർജിയേവ, ഊർജവിതരണത്തിലും മറ്റ് വിതരണ ശൃംഖലകളിലും ഉണ്ടായ തടസങ്ങൾ മാറാൻ സമയം വേണ്ടിവരുമെന്ന് മുന്നറിയിപ്പ് നൽകി. ഊർജവിതരണ ആഘാതത്തിന്റെ ദൈർഘ്യവും തീവ്രതയും ആഗോള സമ്പദ്വ്യവസ്ഥയുടെ ഗതിയെ നിർണയിക്കുമെന്ന് അവർ ചൂണ്ടിക്കാട്ടി.
പ്രധാന അടിസ്ഥാനസൗകര്യങ്ങൾക്ക് സംഭവിച്ച നാശനഷ്ടങ്ങൾ കാരണം വിതരണം വേഗത്തിൽ പുനഃസ്ഥാപിക്കാനാകില്ലെന്നും പ്രശ്നം എത്രയും വേഗം പരിഹരിക്കപ്പെടുന്നത് ആഗോള വിപണികൾക്ക് ഗുണകരമാണെന്നും ജോർജിയേവ പറഞ്ഞു. മിഡിൽ ഈസ്റ്റ് യുദ്ധം അവസാനിപ്പിക്കാനും ഹോർമൂസ് കടലിടുക്ക് വീണ്ടും തുറക്കാനുമുള്ള യുഎസ്-ഇറാൻ ധാരണയ്ക്ക് പിന്നാലെയാണ് ഐഎംഎഫിന്റെ പ്രതികരണം.
ഐഎംഎഫ് ജൂലൈ 8ന് പുതിയ വേൾഡ് ഇക്കണോമിക് ഔട്ട്ലുക്ക് അപ്ഡേറ്റ് പുറത്തിറക്കുമെന്നും അവർ അറിയിച്ചു. ഏപ്രിലിലെ മുൻ അപ്ഡേറ്റിൽ യുദ്ധത്തിന്റെ ആഘാതത്തെ തുടർന്ന് ആഗോള വളർച്ചാ പ്രതീക്ഷകൾ ഐഎംഎഫ് താഴ്ത്തിയിരുന്നു. സംഘർഷം രൂക്ഷമായ സാഹചര്യത്തിൽ അവതരിപ്പിച്ച ഗുരുതരമായ സാഹചര്യ കണക്കുകളിൽ ആഗോള വളർച്ച 2 ശതമാനമായി കുറയാനും പണപ്പെരുപ്പം 6 ശതമാനത്തിന് മുകളിലേക്ക് കുതിക്കാനും സാധ്യത കാണിച്ചിരുന്നു.
ഊർജ ഇറക്കുമതിയിൽ കൂടുതൽ ആശ്രയിക്കുന്നതും നയപരമായ ഇടപെടലുകൾക്കുള്ള സാമ്പത്തിക ശേഷി കുറവുമായ രാജ്യങ്ങളാണ് ഇത്തരം ആഘാതങ്ങളിൽ ഏറ്റവും കൂടുതൽ ബാധിക്കപ്പെടുന്നതെന്ന് ജോർജിയേവ വ്യക്തമാക്കി. ആഫ്രിക്കയിലെ ചില രാജ്യങ്ങളിൽ ഇന്ധനക്ഷാമവും ഉയർന്ന വിലയും ഇതിനകം സമ്മർദമുണ്ടാക്കുന്നുണ്ടെന്നും ഏഷ്യയിലെ വളർന്നുവരുന്ന സമ്പദ്വ്യവസ്ഥകളിലും പെട്രോൾ വില ഗണ്യമായി ഉയർന്നിട്ടുണ്ടെന്നും അവർ പറഞ്ഞു.
ഗൾഫ് മേഖലയിലെ എണ്ണ കയറ്റുമതി രാജ്യങ്ങളും യുദ്ധത്തിന്റെ ആഘാതത്തിൽ നിന്ന് ഒഴിവല്ലെന്ന് ഐഎംഎഫ് മേധാവി മുന്നറിയിപ്പ് നൽകി. ഈ വർഷത്തെ വളർച്ചാ പ്രവചനങ്ങളിൽ കുത്തനെ കുറവ് വരുത്തേണ്ടി വന്നതായും എട്ട് രാജ്യങ്ങളിൽ അഞ്ചെണ്ണം ചുരുങ്ങുന്ന സമ്പദ്വ്യവസ്ഥയിലേക്ക് നീങ്ങുന്നുവെന്നും അവർ ചൂണ്ടിക്കാട്ടി.
അതേസമയം, ഹോർമൂസ് കടലിടുക്കിലെ ഗതാഗതം ഇപ്പോഴും പൂർണമായി സാധാരണ നിലയിലായിട്ടില്ലെന്ന് കപ്പൽ ഗതാഗത നിരീക്ഷണ പ്ലാറ്റ്ഫോമുകൾ സൂചിപ്പിക്കുന്നു. കടലിടുക്ക് തുറക്കുമെന്ന പ്രഖ്യാപനങ്ങൾ ഉണ്ടായിട്ടും വാണിജ്യ കപ്പലുകളുടെ സഞ്ചാരം വളരെ പരിമിതമാണ്. യുദ്ധത്തിന് മുമ്പ് ദിവസേന ഏകദേശം 120 ഗതാഗതങ്ങൾ രേഖപ്പെടുത്തിയിരുന്നിടത്ത് കഴിഞ്ഞ ആഴ്ച ശരാശരി 6.4 ചരക്ക് കപ്പലുകൾ മാത്രമാണ് കടലിടുക്ക് കടന്നതെന്ന് റിപ്പോർട്ടുകൾ വ്യക്തമാക്കുന്നു.