തിരുവനന്തപുരം: സംസ്ഥാനത്ത് ഷിഗെല്ല രോഗബാധ തുടരുന്നതിനിടെ 12 പുതിയ കേസുകൾ കൂടി സ്ഥിരീകരിച്ചു. മലപ്പുറം ആലിപ്പറമ്പ് സ്വദേശിയായ 75കാരിയുടെ മരണകാരണം ഷിഗെല്ലയാണെന്നും സ്ഥിരീകരിച്ചിട്ടുണ്ട്. ജൂൺ 16നാണ് ഇവർ മരിച്ചത്.
തൃശൂർ അരിമ്പൂരിലെ വയോധിക ദമ്പതികൾക്കും കണ്ണൂർ സ്വദേശിയായ 62കാരിക്കുമുൾപ്പെടെയാണ് പുതിയതായി രോഗം കണ്ടെത്തിയത്. ജൂൺ മാസത്തിലെ ആദ്യ 17 ദിവസത്തിനിടെ സംസ്ഥാനത്ത് 91 പേർക്കാണ് ഷിഗെല്ല രോഗബാധ സ്ഥിരീകരിച്ചിരിക്കുന്നത്.
വയനാട്, കോഴിക്കോട്, തിരുവനന്തപുരം, കൊല്ലം, മലപ്പുറം തുടങ്ങിയ ജില്ലകളിലാണ് അടുത്തിടെ കൂടുതൽ കേസുകൾ റിപ്പോർട്ട് ചെയ്തത്. കുട്ടികളിൽ രോഗബാധ കണ്ടെത്തിയ സാഹചര്യത്തിൽ വിദ്യാലയങ്ങളും രോഗബാധിത പ്രദേശങ്ങളും കേന്ദ്രീകരിച്ച് ആരോഗ്യവകുപ്പ് നിരീക്ഷണവും പ്രതിരോധ പ്രവർത്തനങ്ങളും ശക്തമാക്കിയിട്ടുണ്ട്.
മലിനമായ കുടിവെള്ളത്തിലൂടെയും ഭക്ഷണത്തിലൂടെയും പകരുന്ന ബാക്ടീരിയ രോഗമാണ് ഷിഗെല്ലോസിസ്. രോഗബാധിതരുടെ മലത്തിലൂടെ പുറത്തുവരുന്ന ബാക്ടീരിയ മലിനജലത്തിലോ ഭക്ഷണത്തിലോ എത്തുന്നതിലൂടെയും വ്യക്തികളിൽനിന്ന് വ്യക്തികളിലേക്കും രോഗം പകരാം.
വയറിളക്കം, ചിലപ്പോൾ രക്തം കലർന്ന വയറിളക്കം, പനി, വയറുവേദന, ഛർദി എന്നിവയാണ് പ്രധാന ലക്ഷണങ്ങൾ. കുട്ടികൾ, വയോധികർ, പ്രതിരോധശേഷി കുറഞ്ഞവർ എന്നിവരിൽ രോഗം ഗുരുതരമാകാനുള്ള സാധ്യത കൂടുതലാണ്. ശരീരത്തിലെ ജലവും ലവണങ്ങളും വേഗത്തിൽ നഷ്ടപ്പെടുന്നത് ആരോഗ്യനില വഷളാക്കാം.
രോഗലക്ഷണങ്ങൾ കണ്ടാൽ സ്വയം ചികിത്സ നടത്താതെ സമീപത്തെ ആരോഗ്യകേന്ദ്രത്തിലോ ആശുപത്രിയിലോ ചികിത്സ തേടണമെന്ന് ആരോഗ്യവകുപ്പ് നിർദേശിച്ചു. ഡോക്ടറുടെ നിർദേശമില്ലാതെ ആന്റിബയോട്ടിക് മരുന്നുകൾ ഉപയോഗിക്കരുത്. നിർദേശിച്ച മരുന്നുകളുടെ ഡോസ് പൂർണമായി കഴിക്കുകയും വേണം.
കുടിക്കാൻ തിളപ്പിച്ചാറിയ വെള്ളം മാത്രം ഉപയോഗിക്കുക, പാചകം ചെയ്ത ഭക്ഷണം ചൂടോടെ കഴിക്കുക, തുറന്നുവെച്ചതും പഴകിയതുമായ ഭക്ഷണം ഒഴിവാക്കുക, പഴങ്ങളും പച്ചക്കറികളും ശുദ്ധജലത്തിൽ കഴുകുക എന്നിവ പ്രധാന പ്രതിരോധ മാർഗങ്ങളാണ്.
ഭക്ഷണം പാകം ചെയ്യുന്നതിനും കഴിക്കുന്നതിനും മുമ്പ്, ശുചിമുറി ഉപയോഗിച്ചശേഷം, കുട്ടികളെ പരിചരിച്ചതിന് ശേഷം എന്നിവിടങ്ങളിൽ സോപ്പ് ഉപയോഗിച്ച് കൈകൾ നന്നായി കഴുകണം. വീടുകളിലെയും സ്ഥാപനങ്ങളിലെയും കുടിവെള്ള സ്രോതസ്സുകളുടെ ശുചിത്വം ഉറപ്പാക്കണമെന്നും നിർദേശമുണ്ട്.
പകർച്ചവ്യാധികളുടെ വ്യാപനം നിയന്ത്രിക്കുന്നതിന്റെ ഭാഗമായി തദ്ദേശ സ്ഥാപനങ്ങളുമായി ചേർന്ന് ശുചീകരണ പ്രവർത്തനങ്ങളും കുടിവെള്ള പരിശോധനയും ശക്തമാക്കാനാണ് ആരോഗ്യവകുപ്പിന്റെ തീരുമാനം. പൊതുജനങ്ങൾ ജാഗ്രത പാലിക്കണമെന്നും എന്നാൽ അനാവശ്യ ഭീതിയുടെ ആവശ്യമില്ലെന്നും അധികൃതർ വ്യക്തമാക്കി.