ചെന്നൈ: അണ്ണാഡിഎംകെയിലെ വിമതനീക്കങ്ങൾക്ക് പിന്നാലെ മുൻ ആരോഗ്യമന്ത്രിയും വിരാലിമല എംഎൽഎയുമായ സി. വിജയഭാസ്കർ തമിഴ്നാട് നിയമസഭാംഗത്വം രാജിവച്ചു. നിയമസഭാ സ്പീക്കർ ജെ.സി.ഡി. പ്രഭാകറിന് അദ്ദേഹം രാജിക്കത്ത് സമർപ്പിച്ചു. രാജി സ്വീകരിച്ചതായി സ്പീക്കർ അറിയിച്ചു.
2021ലെ നിയമസഭാ തിരഞ്ഞെടുപ്പിന് ശേഷം അണ്ണാഡിഎംകെയിൽ നിന്ന് രാജിവയ്ക്കുന്ന അഞ്ചാമത്തെ എംഎൽഎയാണ് വിജയഭാസ്കർ. രാജിയോടെ തമിഴ്നാട് നിയമസഭയിലെ അണ്ണാഡിഎംകെ അംഗബലം 42 ആയി കുറഞ്ഞു. പാർട്ടിക്കുള്ളിലെ നേതൃത്വവിരുദ്ധ നിലപാടുകൾ ശക്തമാകുന്നതിനിടെയാണ് മുൻ മന്ത്രിയുടെ രാജി.
പാർട്ടി അധ്യക്ഷൻ എടപ്പാടി കെ. പളനിസ്വാമിയുടെ പേര് നേരിട്ട് പരാമർശിക്കാതെയാണ് വിജയഭാസ്കർ സമൂഹമാധ്യമത്തിൽ നേതൃത്വത്തിനെതിരെ വിമർശനം ഉന്നയിച്ചത്. നേതൃത്വം അധികാരമോ അഹങ്കാരമോ മാത്രമാകരുതെന്നും പ്രവർത്തകരെ ഒരുമിച്ച് നയിക്കാൻ കഴിയണമെന്നും അദ്ദേഹം പറഞ്ഞു. പാർട്ടി പ്രവർത്തകരുടെ മനസ്സ് നേടാൻ കഴിയാത്ത നേതൃത്വത്തിന് പൊതുജനങ്ങളുടെ വിശ്വാസം എങ്ങനെ നേടാനാകുമെന്നും അദ്ദേഹം ചോദിച്ചു.
പ്രവർത്തകരുടെ വികാരങ്ങൾക്ക് വില നൽകാത്ത പാർട്ടിയിൽ തുടരാൻ കഴിയുമോ എന്ന ചോദ്യവും വിജയഭാസ്കർ ഉയർത്തിയിരുന്നു. ഈ വിമർശനത്തിന് പിന്നാലെയാണ് എംഎൽഎ സ്ഥാനം രാജിവച്ചത്. എന്നാൽ തന്റെ അടുത്ത രാഷ്ട്രീയനീക്കത്തെക്കുറിച്ച് രാജിക്കൊപ്പം ഔദ്യോഗിക പ്രഖ്യാപനം നടത്തിയിട്ടില്ല.
അംബാസമുദ്രം എംഎൽഎ എസക്കി സുബ്ബയ്യ, പെരുന്ധുരൈ എംഎൽഎ എസ്. ജയകുമാർ, മധുരാന്തകം എംഎൽഎ മരകതം കുമാരവേൽ, ധാരാപുരം എംഎൽഎ പി. സത്യഭാമ എന്നിവരാണ് നേരത്തെ രാജിവച്ച മറ്റ് അണ്ണാഡിഎംകെ അംഗങ്ങൾ. തുടർച്ചയായ രാജികൾ പാർട്ടിയുടെ നിയമസഭാ സാന്നിധ്യത്തെയും ആഭ്യന്തര ഐക്യത്തെയും കൂടുതൽ സമ്മർദത്തിലാക്കിയിരിക്കുകയാണ്.