ന്യൂഡൽഹി: രാജ്യത്തെ ഇന്ധന വിതരണവുമായി ബന്ധപ്പെട്ട ആശങ്കകൾ കുറഞ്ഞ സാഹചര്യത്തിൽ പെട്രോൾ, ഡീസൽ വിൽപ്പനയ്ക്ക് ഏർപ്പെടുത്തിയിരുന്ന താൽക്കാലിക നിയന്ത്രണങ്ങൾ നീക്കാൻ കേന്ദ്രം തീരുമാനിച്ചു. ജൂലൈ 1 മുതൽ നിയന്ത്രണങ്ങൾ ഒഴിവാക്കുമെന്നാണ് വിവരം.
മിഡിൽ ഈസ്റ്റിലെ സംഘർഷത്തെ തുടർന്ന് ആഗോള വിതരണ ശൃംഖലയിൽ തടസ്സമുണ്ടാകുമോ എന്ന ആശങ്ക ഉയർന്നിരുന്നു. ഇതിന്റെ പശ്ചാത്തലത്തിലാണ് സർക്കാർ മുൻകരുതലായി ഇന്ധന വിൽപ്പനയിൽ ചില നിയന്ത്രണങ്ങൾ ഏർപ്പെടുത്തിയത്. പൊതുജനങ്ങൾക്ക് ആവശ്യത്തിന് ഇന്ധനം ലഭ്യമാണെന്ന് ഉറപ്പാക്കുകയായിരുന്നു ലക്ഷ്യം.
നിയന്ത്രണങ്ങളുടെ ഭാഗമായി ഡീസൽ വാങ്ങലിന് സർക്കാർ ദിവസേന പരിധി നിശ്ചയിച്ചിരുന്നു. എന്നാൽ നിലവിലെ സാഹചര്യത്തിൽ ഇന്ധന ലഭ്യതയിൽ ആശങ്ക വേണ്ടെന്നാണ് സർക്കാർ വിലയിരുത്തൽ. ഇതോടെ താൽക്കാലിക പരിധികൾ ഒഴിവാക്കി ഉപയോക്താക്കൾക്ക് വീണ്ടും ചില്ലറ വിൽപ്പനശാലകളിൽ നിന്ന് ഇന്ധനം വാങ്ങാനാകും.
ആഗോള ഊർജ വിപണിയിലെ അനിശ്ചിതത്വം വർധിച്ചിരുന്ന സമയത്ത് ആഭ്യന്തര ഇന്ധന വിതരണത്തെ സംരക്ഷിക്കാനായിരുന്നു നിയന്ത്രണങ്ങൾ. സാഹചര്യം സാധാരണ നിലയിലേക്ക് മാറുന്നതായി വിലയിരുത്തിയതോടെയാണ് നിയന്ത്രണങ്ങൾ പിൻവലിക്കുന്ന നടപടി.