ഖാർത്തൂം: ലോകത്തിലെ ഏറ്റവും വലിയ കുടിയൊഴിപ്പിക്കൽ പ്രതിസന്ധി ഇപ്പോഴും സുഡാനിലാണെന്ന് ഐക്യരാഷ്ട്രസഭ വ്യക്തമാക്കി. യുദ്ധം ആരംഭിച്ച് മൂന്ന് വർഷം പിന്നിടുമ്പോഴും ലക്ഷക്കണക്കിന് ജനങ്ങൾ സുരക്ഷിതമായ താമസസ്ഥലമില്ലാതെ ദുരിതത്തിലാണെന്ന് യുഎൻ അഭയാർഥി ഏജൻസിയുടെ സുഡാനിലെ പ്രതിനിധി മാരി-ഹെലൻ വെർണി അറിയിച്ചു. കുറഞ്ഞത് 45 ലക്ഷം സുഡാനികൾ മറ്റു രാജ്യങ്ങളിൽ അഭയം തേടിയിട്ടുണ്ടെന്നും ഏകദേശം 90 ലക്ഷം പേർ രാജ്യത്തിനുള്ളിൽ തന്നെ കുടിയൊഴിഞ്ഞ നിലയിൽ തുടരുകയാണെന്നും അവർ പറഞ്ഞു.
സുഡാൻ സൈന്യം ഖാർത്തൂം, ഗെസിറ, സെന്നാർ സംസ്ഥാനങ്ങൾ തിരിച്ചുപിടിക്കുകയും ഈ മേഖലകളിൽ പോരാട്ടം കുറഞ്ഞതിനെ തുടർന്ന് ചിലർ വീടുകളിലേക്ക് മടങ്ങുകയും ചെയ്തിട്ടുണ്ടെന്ന് യുഎൻ ചൂണ്ടിക്കാട്ടി. ഏകദേശം 45 ലക്ഷം പേർ വീടുകളിലേക്ക് തിരിച്ചെത്തിയതായാണ് കണക്ക്. ഇതിൽ ഏകദേശം 18 ലക്ഷം പേർ ഖാർത്തൂം സംസ്ഥാനത്തേക്ക് എത്തിയവരാണ്. എന്നിരുന്നാലും മടങ്ങിവരുന്നവർക്കായി അടിസ്ഥാന സൗകര്യങ്ങൾ, ഭക്ഷണം, ആരോഗ്യസഹായം, സുരക്ഷ എന്നിവ ഉറപ്പാക്കുക ഇപ്പോഴും വലിയ വെല്ലുവിളിയായി തുടരുന്നു.
2023 ഏപ്രിൽ മധ്യത്തിൽ സുഡാനീസ് സായുധസേനയും പാരാമിലിട്ടറി റാപ്പിഡ് സപ്പോർട്ട് ഫോഴ്സസും തമ്മിൽ സംഘർഷം ആരംഭിച്ചതിനുശേഷം രാജ്യത്ത് മനുഷ്യാവകാശ-മാനുഷിക പ്രതിസന്ധി കനത്തിരിക്കുകയാണ്. അന്താരാഷ്ട്ര സംഘടനകളുടെ കണക്കുകൾ പ്രകാരം പതിനായിരങ്ങൾ കൊല്ലപ്പെടുകയും രാജ്യത്തിനകത്തും പുറത്തുമായി കോടിക്കണക്കിന് ജീവിതങ്ങൾ യുദ്ധത്തിന്റെ ആഘാതത്തിൽ കുടുങ്ങുകയും ചെയ്തു. മടങ്ങിവരുന്നവർക്കും ഇപ്പോഴും അഭയാർഥി ജീവിതം നയിക്കുന്നവർക്കും ദീർഘകാല പിന്തുണ ആവശ്യമാണെന്നാണ് യുഎൻ മുന്നറിയിപ്പ്.