കുവൈത്ത് സിറ്റി: കുവൈത്തിന്റെ ദേശീയ ഗാനങ്ങൾ വെറും സംഗീതസൃഷ്ടികളല്ല, രാജ്യത്തിന്റെ ചരിത്രവും ഐക്യവും പൗരബോധവും തലമുറകളിലൂടെ കൈമാറുന്ന ജീവിച്ചിരിക്കുന്ന പൈതൃകമാണെന്ന് സാംസ്കാരിക, മാധ്യമ, അക്കാദമിക് രംഗത്തെ പ്രമുഖർ വിലയിരുത്തി. ഔദ്യോഗിക ചടങ്ങുകളിലും ദേശീയ ആഘോഷങ്ങളിലും മുഴങ്ങുന്ന ഈ ഗാനങ്ങൾ രാജ്യസ്നേഹവും കൂട്ടായ അഭിമാനവും ജനങ്ങളിൽ ആഴത്തിൽ ഉറപ്പിക്കുന്നു.
കുവൈത്തി ദേശീയഗാനങ്ങൾ സംഗീതമൂല്യം മാത്രമല്ല വഹിക്കുന്നത്; രാജ്യത്തിന്റെ ചിഹ്നങ്ങൾ, പാരമ്പര്യങ്ങൾ, സാമൂഹിക ഓർമ്മകൾ, ദേശീയ തിരിച്ചറിവ് എന്നിവ സംരക്ഷിക്കുന്ന ചരിത്രരേഖകളായും അവ പ്രവർത്തിക്കുന്നു. പുതുതലമുറയെ സാംസ്കാരിക വേരുകളോട് ബന്ധിപ്പിക്കുന്ന ശക്തിയുമാണ് ഈ ഗാനങ്ങൾ.
ജി.സി.സി സംയുക്ത പരിപാടി നിർമ്മാണ സ്ഥാപനത്തിന്റെ ഡയറക്ടർ ജനറൽ ഷെയ്ഖ് മുബാറക് ഫഹദ് അൽ ജാബർ അൽ സബാഹ്, ദേശീയ ഗാനങ്ങൾ വിശ്വസ്തതയും പങ്കുവെക്കുന്ന ഗൾഫ് തിരിച്ചറിവും ശക്തിപ്പെടുത്തുന്ന സാംസ്കാരിക മാർഗങ്ങളാണെന്ന് പറഞ്ഞു. ജിസിസി ഉച്ചകോടികൾക്കും ദേശീയ പരിപാടികൾക്കും സ്ഥാപനം നിരവധി ഗാനങ്ങൾ നിർമ്മിച്ചിട്ടുണ്ടെന്നും സൃഷ്ടിപരമായ കഥപറച്ചിലിലൂടെ പ്രാദേശിക ഐക്യവും പൈതൃകബോധവും പ്രോത്സാഹിപ്പിക്കുന്നുവെന്നും അദ്ദേഹം വ്യക്തമാക്കി.
ഡിജിറ്റൽ പ്ലാറ്റ്ഫോമുകൾ ദേശീയഗാനങ്ങളുടെ സ്വാധീനം വൻതോതിൽ വർധിപ്പിച്ചതായി അദ്ദേഹം ചൂണ്ടിക്കാട്ടി. സ്ഥാപനം നിർമ്മിച്ച ഗാനങ്ങൾ ഓൺലൈൻ വേദികളിൽ ലക്ഷക്കണക്കിനും ദശലക്ഷക്കണക്കിനും ആളുകളിലെത്തുന്നത് ഇവ സമൂഹത്തിന്റെ എല്ലാ തലങ്ങളോടും സംസാരിക്കാൻ കഴിയുന്ന ശക്തിയുള്ളവയാണെന്ന് തെളിയിക്കുന്നു.
നാഷണൽ കൗൺസിൽ ഫോർ കൾച്ചർ, ആർട്സ് ആൻഡ് ലെറ്റേഴ്സിലെ കലാ വിഭാഗം അസിസ്റ്റന്റ് സെക്രട്ടറി ജനറൽ മുസാഅദ് അൽ സാമെൽ, ദേശീയകല ബോധവൽക്കരണത്തിനും രാജ്യബന്ധം ശക്തിപ്പെടുത്തുന്നതിനുമുള്ള പ്രധാന മാധ്യമമാണെന്ന് പറഞ്ഞു. കുവൈത്തി പൈതൃകത്തിൽനിന്ന് പ്രചോദനം ഉൾക്കൊണ്ട നിരവധി ദേശീയകലാപ്രവർത്തനങ്ങൾ കൗൺസിൽ സമീപകാലത്ത് നിർമ്മിച്ചതായും അദ്ദേഹം കൂട്ടിച്ചേർത്തു.
25-ാമത് കുവൈത്ത് തിയേറ്റർ ഫെസ്റ്റിവലിൽ അവതരിപ്പിച്ച ‘ബൈത്ത് വ ബഹർ’ എന്ന ഓപ്പററ്റിനെ അൽ സാമെൽ ഉദാഹരണമായി ചൂണ്ടിക്കാട്ടി. കവി ഡോ. ഖലഫ് അൽ ഖാൽദി രചിച്ച ഈ കൃതി വീടും കടലും എന്ന കുവൈത്തി ജീവിതസ്മരണകളെ ദേശീയ പൈതൃകവുമായി ബന്ധിപ്പിച്ച കലാനുഭവമായിരുന്നു.
വിവരമന്ത്രാലയത്തിലെ റേഡിയോ ഡയറക്ടർ ജനറൽ ഡോ. യൂസഫ് അൽ സുരൈഅ, കുവൈത്ത് റേഡിയോയുടെ തുടക്കം മുതൽ ദേശീയഗാനങ്ങൾ അതിന്റെ പ്രധാന സാംസ്കാരിക പൈതൃകങ്ങളിൽ ഒന്നാണെന്ന് പറഞ്ഞു. 1958ൽ കുവൈത്ത് റേഡിയോ ഓർക്കസ്ട്ര രൂപംകൊണ്ടത് കലാസൃഷ്ടിക്കും ദേശീയബോധത്തിനും വലിയ വഴിത്തിരിവായിരുന്നു.
‘മുതക്കറാത്ത് ബഹാർ’ പോലുള്ള ഓപ്പററ്റുകൾ ഗൾഫിലും അറബ് ലോകത്തും മുഴങ്ങിക്കേട്ട കുവൈത്തിന്റെ സാംസ്കാരിക മുദ്രകളാണെന്ന് അദ്ദേഹം ഓർമ്മിപ്പിച്ചു. വിവരമന്ത്രാലയം കവികൾ, സംഗീതസംവിധായകർ, ഗായകർ എന്നിവരെ പിന്തുണച്ച് പുതിയ ദേശീയഗാനങ്ങളും ഓപ്പററ്റുകളും നിർമ്മിക്കുന്നത് തുടരുന്നുവെന്ന് ടെലിവിഷൻ ഡയറക്ടർ ജനറൽ ബദർ അൽ ദായി വ്യക്തമാക്കി.
കുവൈത്ത് യൂണിവേഴ്സിറ്റിയിലെ ആന്ത്രോപോളജി പ്രൊഫസർ ഡോ. മഹാ അൽ സിജാരി, ദേശീയഗാനങ്ങൾ ആഘോഷകാലത്തും പ്രതിസന്ധിക്കാലത്തും സമൂഹത്തെ ഒന്നിപ്പിക്കുന്ന സാമൂഹികബന്ധങ്ങളാണെന്ന് പറഞ്ഞു. പഴയ ജീവിതരീതികളും പൈതൃക ചിഹ്നങ്ങളും യഥാർത്ഥ പദങ്ങളും വഴിയാണ് ഇവ തലമുറകളുടെ ഇടയിലുള്ള അകലം കുറയ്ക്കുന്നത്.
കവി ബദർ ബൂരസ്ലി, പ്രണയഗാനം വ്യക്തിയുടെ വികാരമാകുമ്പോൾ ദേശീയഗാനം രാജ്യത്തിന്റെ ഹൃദയമിടിപ്പാണെന്ന് വിശേഷിപ്പിച്ചു. ‘വതൻ അൽ നഹാർ’, ‘ഹബീബി യാ വതൻ’, ‘ജാർ അൽ നുജൂം’ തുടങ്ങിയ അദ്ദേഹത്തിന്റെ ഗാനങ്ങൾ കുവൈത്തിന്റെ ചരിത്രവും ജനങ്ങളുടെ ത്യാഗവും പ്രതീക്ഷയും ഉൾക്കൊള്ളുന്ന ജനസ്മരണകളായി തുടരുന്നു.
കവി അഹ്മദ് അൽ ശർഖാവിയും സംഗീതസംവിധായകൻ അബ്ദുല്ല അൽ ഖൗദും ദേശീയഗാനങ്ങളുടെ ദീർഘായുസിന് സത്യസന്ധമായ ദേശബന്ധമാണ് പ്രധാനമെന്ന് അഭിപ്രായപ്പെട്ടു. പൈതൃക താളങ്ങളെ ഓർക്കസ്ട്രൽ ക്രമീകരണങ്ങളുമായി ചേർത്ത് ആധുനികതയിലും സ്വാധീനം നഷ്ടപ്പെടാത്ത ദേശഗാനങ്ങൾ സൃഷ്ടിക്കാമെന്നത് കുവൈത്തിന്റെ സംഗീതാനുഭവം തെളിയിക്കുന്നു.