കുവൈത്ത് സിറ്റി: ഹോർമുസ് കടലിടുക്ക് വീണ്ടും തുറന്നതിനെ തുടർന്ന് കുവൈത്ത് എണ്ണ ഉൽപ്പാദനം ഒരു ആഴ്ചയ്ക്കുള്ളിൽ പ്രതിദിനം രണ്ട് മില്യൺ ബാരലായി ഉയർത്താൻ പദ്ധതിയിടുന്നതായി കുവൈത്ത് പെട്രോളിയം കോർപ്പറേഷൻ അറിയിച്ചു. യുഎസ്–ഇറാൻ സമാധാന ധാരണയുടെ പശ്ചാത്തലത്തിലാണ് കുവൈത്തിന്റെ ഊർജമേഖല ഘട്ടംഘട്ടമായി സാധാരണ നിലയിലേക്ക് മടങ്ങുന്നത്.
കുവൈത്ത് പെട്രോളിയം കോർപ്പറേഷൻ ഡെപ്യൂട്ടി ചെയർമാനും സിഇഒയുമായ ഷെയ്ഖ് നവാഫ് സൗദ് അൽ സബാഹാണ് തീരുമാനം വ്യക്തമാക്കിയത്. അന്താരാഷ്ട്ര വാണിജ്യ കപ്പൽഗതാഗതം കുവൈത്ത് തുറമുഖങ്ങളിലേക്ക് സാധാരണ നിലയിൽ പുനരാരംഭിച്ചാൽ യുദ്ധത്തിന് മുൻപുള്ള ഉൽപ്പാദന നില കുറച്ച് ആഴ്ചകൾക്കുള്ളിൽ വീണ്ടെടുക്കാനാകുമെന്ന് അദ്ദേഹം പറഞ്ഞു.
യുദ്ധകാലത്ത് കേടുപാടുകൾ സംഭവിച്ച ഊർജ അടിസ്ഥാനസൗകര്യങ്ങളിൽ ആവശ്യമായ പ്രധാന അറ്റകുറ്റപ്പണികൾ പൂർത്തിയാക്കിയതായി കെപിസി അറിയിച്ചു. ഇതോടെ മുമ്പ് കണക്കാക്കിയതിലധികം വേഗത്തിൽ ഉൽപ്പാദന ശേഷി വീണ്ടെടുക്കാൻ കഴിയുമെന്നാണ് വിലയിരുത്തൽ.
സംഘർഷകാലത്ത് പുറപ്പെടുവിച്ച എല്ലാ ഫോഴ്സ് മജ്യൂർ നോട്ടീസുകളും ഉടൻ പിൻവലിക്കുമെന്നും സാധാരണ പ്രവർത്തനങ്ങളും എണ്ണവിതരണവും ഘട്ടംഘട്ടമായി പുനരാരംഭിക്കുമെന്നും കെപിസി വ്യക്തമാക്കി. അന്താരാഷ്ട്ര ഉപഭോക്താക്കളോടും പങ്കാളികളോടും കരാർപ്രകാരം പൂർണ വിതരണം ഉറപ്പാക്കുന്നതിനായി അടുത്ത് പ്രവർത്തിക്കുമെന്നാണ് കോർപ്പറേഷന്റെ നിലപാട്.
ഹോർമുസ് കടലിടുക്ക് ആഗോള എണ്ണ ഗതാഗതത്തിലെ നിർണായക കടൽപാതയായതിനാൽ, അതിന്റെ തുറക്കൽ ഗൾഫ് ഊർജ വിപണിക്കും ആഗോള വിതരണ ശൃംഖലകൾക്കും നിർണായകമാണ്. കുവൈത്തിന്റെ ഉൽപ്പാദന പുനരാരംഭം അന്താരാഷ്ട്ര എണ്ണവിപണിയിലെ സ്ഥിരതയ്ക്ക് സഹായകരമാകുമെന്നാണ് പ്രതീക്ഷ.