കുവൈത്ത് സിറ്റി: ഫർവാനിയ മേഖലയിൽ തിങ്കളാഴ്ച ഉച്ചയോടെ അപ്പാർട്ട്മെന്റ് കെട്ടിടത്തിൽ ഉണ്ടായ തീപിടിത്തത്തിൽ ഒരാൾ മരിക്കുകയും രണ്ടുപേർക്ക് പരിക്കേൽക്കുകയും ചെയ്തു. കുവൈത്ത് ഫയർ ഫോഴ്സാണ് വിവരം അറിയിച്ചത്.
തീപിടിത്തം സംബന്ധിച്ച വിവരം ലഭിച്ചതിനെ തുടർന്ന് ഫർവാനിയ, സുബ്ഹാൻ, സെർച്ച് ആൻഡ് റെസ്ക്യൂ കേന്ദ്രങ്ങളിലെ അഗ്നിശമന സംഘങ്ങൾ ഉടൻ സ്ഥലത്തെത്തി. തീ നിയന്ത്രണവിധേയമാക്കിയതിനു ശേഷം സ്ഥലം ബന്ധപ്പെട്ട അധികാരികൾക്ക് കൈമാറി.
തീപിടിത്തത്തിന്റെ കാരണം, മരിച്ചവരുടെയും പരിക്കേറ്റവരുടെയും തിരിച്ചറിയൽ വിവരങ്ങൾ എന്നിവ അധികൃതർ പുറത്തുവിട്ടിട്ടില്ല. ആവശ്യമായ നിയമനടപടികളും സാങ്കേതിക പരിശോധനകളും പൂർത്തിയാക്കിയശേഷമേ കാരണം വ്യക്തമാകൂ.
ജനങ്ങളും താമസക്കാരും ഫയർ സേഫ്റ്റി നിയമങ്ങൾ കർശനമായി പാലിക്കണമെന്ന് കുവൈത്ത് ഫയർ ഫോഴ്സ് അഭ്യർഥിച്ചു. ജീവനും സ്വത്തിനും സംരക്ഷണം ഉറപ്പാക്കാൻ മുൻകരുതൽ സംവിധാനങ്ങൾ, അലാറങ്ങൾ, എമർജൻസി പുറപ്പെടൽ മാർഗങ്ങൾ എന്നിവ പ്രവർത്തനക്ഷമമാണെന്ന് ഉറപ്പാക്കേണ്ടതുണ്ടെന്നും അധികൃതർ ഓർമ്മിപ്പിച്ചു.