കുവൈത്ത് സിറ്റി: സഹൽ ആപ്പിലൂടെ വാഹന ഉടമസ്ഥാവകാശ പുതുക്കൽ സേവനം വീണ്ടും സജീവമാക്കിയതായി ആഭ്യന്തര മന്ത്രാലയം അറിയിച്ചു. ഇൻഷുറൻസ് റെഗുലേഷൻ യൂണിറ്റിന്റെ സിസ്റ്റങ്ങളിലെ വികസനവും നവീകരണവും പൂർത്തിയായതിനെ തുടർന്നാണ് സേവനം പുനരാരംഭിച്ചത്.
വാഹന ഉടമസ്ഥാവകാശവുമായി ബന്ധപ്പെട്ട ഇടപാടുകൾ കൂടുതൽ കാര്യക്ഷമമാക്കുകയും നടപടിക്രമങ്ങളുടെ വേഗവും കൃത്യതയും ഉയർത്തുകയും ചെയ്യുന്നതാണ് പുതുക്കിയ സംവിധാനത്തിന്റെ ലക്ഷ്യമെന്ന് മന്ത്രാലയം വ്യക്തമാക്കി. സർക്കാരിന്റെ ഏകീകൃത ഡിജിറ്റൽ പ്ലാറ്റ്ഫോമായ സഹൽ വഴി ഉപയോക്താക്കൾക്ക് പുതുക്കൽ നടപടികൾ കൂടുതൽ സുഗമമായി പൂർത്തിയാക്കാൻ കഴിയുമെന്ന് അധികൃതർ അറിയിച്ചു.
ഇ-ഗവൺമെന്റ് സേവനങ്ങൾ ആധുനികമാക്കുന്നതിനുള്ള തുടർച്ചയായ ശ്രമങ്ങളുടെ ഭാഗമായാണ് ഈ സേവനം വീണ്ടും പ്രവർത്തനക്ഷമമാക്കിയത്. സർക്കാർ ഓഫീസുകളിലേക്കുള്ള നേരിട്ടുള്ള സന്ദർശനങ്ങൾ കുറയ്ക്കുകയും പൗരന്മാർക്കും താമസക്കാർക്കും ഇടപാടുകൾ വേഗത്തിൽ പൂർത്തിയാക്കാൻ സൗകര്യം ഒരുക്കുകയും ചെയ്യുന്നതാണ് പദ്ധതി.
വാഹന ഉടമസ്ഥാവകാശ പുതുക്കലിനും ബന്ധപ്പെട്ട മറ്റു സേവനങ്ങൾക്കും സഹൽ ആപ്പ് ഉപയോഗിക്കണമെന്ന് മന്ത്രാലയം ഉപയോക്താക്കളോട് അഭ്യർഥിച്ചു. കുവൈത്തിന്റെ ഡിജിറ്റൽ ട്രാൻസ്ഫർമേഷൻ ലക്ഷ്യങ്ങളുമായി ചേർന്ന് കൂടുതൽ വിശ്വാസ്യതയും ഉപയോഗസൗകര്യവും ഉറപ്പാക്കുന്ന രീതിയിലാണ് സിസ്റ്റം മെച്ചപ്പെടുത്തലുകൾ നടപ്പാക്കിയതെന്നും മന്ത്രാലയം അറിയിച്ചു.