ലോസ് ആഞ്ചലസ്: ഫിഫ ലോകകപ്പിൽ ന്യൂസിലൻഡിനെതിരായ ഉദ്ഘാടന ഗ്രൂപ്പ് മത്സരത്തിന് പിന്നാലെ ലോസ് ആഞ്ചലസിൽ തുടരാൻ അനുവദിക്കാതെ ഉടൻ മെക്സിക്കോയിലേക്ക് മടങ്ങേണ്ടിവന്ന സാഹചര്യത്തിൽ ഫിഫയ്ക്ക് ഔദ്യോഗിക പരാതി നൽകുമെന്ന് ഇറാൻ ഫുട്ബോൾ ഫെഡറേഷൻ അറിയിച്ചു. ലോകകപ്പിൽ പങ്കെടുക്കുന്ന എല്ലാ ടീമുകൾക്കും സമാനമായ തയ്യാറെടുപ്പ് സൗകര്യവും യാത്രാ സാഹചര്യവും ലഭിക്കണമെന്ന തത്വത്തോട് ഈ നിയന്ത്രണം പൊരുത്തപ്പെടുന്നില്ലെന്നാണ് ഇറാന്റെ നിലപാട്.
ഗ്രൂപ്പ് ജിയിലെ ആദ്യ മത്സരത്തിൽ ന്യൂസിലൻഡിനോട് 2–2 സമനില നേടിയ ഇറാൻ, മത്സരശേഷം മൂന്ന് മണിക്കൂറിനകം ലോസ് ആഞ്ചലസ് വിട്ട് മെക്സിക്കോയിലെ പരിശീലന ക്യാമ്പിലേക്ക് മടങ്ങേണ്ടിവന്നു. യുഎസ് സർക്കാരിന്റെ യാത്രാ നിയന്ത്രണങ്ങൾ കാരണം ഇറാൻ ടീമിന് അമേരിക്കയിലെ മത്സരങ്ങൾക്ക് ശേഷം രാത്രി താമസിക്കാനും സാധാരണ റിക്കവറി സെഷനുകൾ നടത്താനും കഴിയുന്നില്ലെന്ന് റിപ്പോർട്ടുകൾ വ്യക്തമാക്കുന്നു.
ഇറാൻ അടുത്തതായി ബെൽജിയത്തെ ലോസ് ആഞ്ചലസിൽ നേരിടും. ആ മത്സരത്തിന് മുന്നോടിയായി ഫിഫയ്ക്ക് പരാതി നൽകുമെന്നും നിയന്ത്രണങ്ങൾ ടീമിന്റെ തയ്യാറെടുപ്പിനെ ബാധിക്കാമെന്നും ഇസ്ലാമിക് റിപ്പബ്ലിക് ഓഫ് ഇറാൻ ഫുട്ബോൾ ഫെഡറേഷൻ വ്യക്തമാക്കി. എന്നിരുന്നാലും ടീം പരിശീലനപരിപാടികളിൽ ശ്രദ്ധ കേന്ദ്രീകരിക്കുകയും ബെൽജിയത്തിനെതിരായ മത്സരത്തിനായി പൂർണമായി തയ്യാറെടുക്കുകയും ചെയ്യുമെന്ന് ഫെഡറേഷൻ അറിയിച്ചു.
ഇറാൻ–അമേരിക്ക യുദ്ധസാഹചര്യത്തിന്റെ പശ്ചാത്തലത്തിൽ തന്നെ ഇറാൻ ടീമിന്റെ ലോകകപ്പ് പങ്കാളിത്തം നേരത്തെ അനിശ്ചിതത്വത്തിലായിരുന്നു. ഫിഫയുടെയും യുഎസ് സർക്കാരിന്റെയും ചർച്ചകൾക്കുശേഷമാണ് ലോകകപ്പിന് പത്ത് ദിവസം മുമ്പ് മാത്രമായി ടീമിന് വിസ ലഭിച്ചത്. പരിശീലകൻ അമിർ ഗാലെനോയിയുടെ നേതൃത്വത്തിലുള്ള സംഘം പിന്നീട് മെക്സിക്കോയിലെ ടിഹുവാനയിൽ ക്യാമ്പ് ആരംഭിച്ചു.
ന്യൂസിലൻഡിനെതിരായ മത്സരത്തിനു മുൻ ദിവസം മാത്രമാണ് ഇറാൻ ലോസ് ആഞ്ചലസിലെത്തിയത്. മത്സരത്തിനു ശേഷം രാത്രി അവിടെ താമസിച്ച് റിക്കവറി നടത്താനായിരുന്നു ടീമിന്റെ ആദ്യം നിശ്ചയിച്ച പദ്ധതി. എന്നാൽ ഉടൻ മടങ്ങണമെന്ന് അറിയിച്ചതോടെ പുനഃക്രമീകരണം നടത്തേണ്ടിവന്നു. ടീം തയ്യാറെടുപ്പിന് അത്യന്താപേക്ഷിതമായ വിശ്രമവും ചികിത്സയും റിക്കവറി സംവിധാനങ്ങളും തടസപ്പെട്ടുവെന്നാണ് ഇറാൻ ക്യാമ്പിന്റെ പരാതി.
മത്സരശേഷം പരിശീലകൻ ഗാലെനോയി നടപടിയെ കടുത്ത ഭാഷയിൽ വിമർശിച്ചു. കളിക്ക് പിന്നാലെ ഉടൻ വിമാനത്തിൽ കയറണമെന്ന് പറയുന്നത് ടീമിന് വലിയ ബുദ്ധിമുട്ടുണ്ടാക്കുന്നതാണെന്നും തങ്ങളെ കൂടുതൽ ബുദ്ധിമുട്ടിലാക്കുന്ന രീതിയിലാണ് കാര്യങ്ങൾ ക്രമീകരിക്കപ്പെടുന്നതെന്നും അദ്ദേഹം പറഞ്ഞു. ലോകകപ്പിൽ ഏറ്റവും കൂടുതൽ സമ്മർദം നേരിടുന്ന ടീമാണ് ഇറാനെന്നും ഫെഡറേഷൻ, മാധ്യമസംഘം, ടീം മാനേജ്മെന്റ് എന്നിവർക്ക് സാധാരണ സൗകര്യങ്ങൾ ലഭിക്കുന്നില്ലെന്നും അദ്ദേഹം ചൂണ്ടിക്കാട്ടി.
മത്സരത്തിനു ശേഷം ഫിഫ പ്രസിഡന്റ് ജിയാനി ഇൻഫന്റിനോ ഇറാൻ ടീമിന്റെ ഡ്രസിങ് റൂം സന്ദർശിച്ചിരുന്നു. ടീം നേരിടുന്ന സാഹചര്യം മനസ്സിലാക്കുന്നുവെന്നും നിങ്ങൾ എല്ലാവരെയും കടന്നുപോകാൻ കഴിവുള്ളവരാണെന്നും അദ്ദേഹം ഇറാൻ താരങ്ങളോട് പറഞ്ഞതായി റിപ്പോർട്ടുണ്ട്. എന്നാൽ ഫിഫ അധ്യക്ഷന്റെ ആശ്വാസവാക്കുകൾക്കപ്പുറം പ്രായോഗിക പരിഹാരം വേണമെന്നാണ് ഇറാന്റെ ആവശ്യം.
ലോകകപ്പ് പോലുള്ള ആഗോള വേദിയിൽ രാഷ്ട്രീയ-സുരക്ഷാ നിയന്ത്രണങ്ങൾ ടീമുകളുടെ മത്സരസമത്വത്തെ ബാധിക്കരുതെന്ന ചർച്ചയും ഇതോടെ ശക്തമായി. യാത്ര, താമസം, റിക്കവറി, പരിശീലനക്രമം എന്നിവയിൽ ചെറിയ മാറ്റങ്ങൾ പോലും ടീമിന്റെ പ്രകടനത്തെ ബാധിക്കാം. ബെൽജിയത്തിനെതിരായ നിർണായക മത്സരത്തിന് മുമ്പ് ഇറാൻ ഉന്നയിക്കുന്ന പരാതി ഫിഫ എങ്ങനെ കൈകാര്യം ചെയ്യുമെന്നതാണ് ഇനി ശ്രദ്ധിക്കപ്പെടുന്നത്.